村爺爺龍蝦湯.泡飯.燉湯專家

營業中

休息中

想試好耐，今日終於的起心肝去排隊，等咗大概半個鐘入到坐。叫咗兩個套餐再加一個小食。殿龍蝦湯泡飯同普通龍蝦湯泡飯唔同，佢依一個就有半隻龍蝦，其他嗰啲剩係得蝦頭。喺門口排隊嘅時候已經落定單，入到去好快就已經有嘢食。佢海鮮嘅份量真係好多，好多蜆。龍蝦湯飲落係好飲嘅，飲得出係熬製咗好耐嘅味道。唔係好味精，但係可能就會比較啱配米線或者面，配白飯有啲唔係幾夾，下次應該轉米線會好味啲，佢個湯都幾濃味下。花膠螺頭雞煲好足料同埋好好飲啊，雖然有少少鹹，但係配白飯就啱啱好。飲落都冇乜味精感，佢俾咗半隻雞，雞味好濃郁，而且雞肉用嚟煮完個湯都好滑。而且都有好幾片花膠下，好啱冬天食可以滋潤一下。值得提醒嘅係，因為真係好大份！我哋都真係食唔晒，想問佢拎外賣盒，點知原來佢冇做外賣，連外賣盒都冇提供。所以下次記得要留肚好肚餓先去食啦，因為佢份量真係超級大份性價比好高。南乳雞翼配薯角食到中段先記得影相，佢係有三隻雞翼，好香南乳味，不過有少少油啦，可能隔油格得唔夠。但都值得食嘅。