翡翠茶餐廳

營業中

休息中

今次係午餐時間去買外賣，叫左個芝士焗豬扒飯同個乾炒叉燒意粉餐，配埋兩杯嘢飲盛惠$115。芝士焗豬扒飯焗豬扒飯熱辣辣，因為佢係即叫即焗，所以就要等耐少少，不過都係大概10-15分鐘就有，算快手。上面啲芝士好似焗太耐有少少燶左，不過影響唔大。入面有一大塊豬扒，啲肉都好軟。餐廳已經切好曬一塊塊，所以食起上黎都好方便。飯係炒底，幾香口，而且好多汁唔怕會太乾，不過我地覺得個汁好濃味好甜，如果唔鍾意咁甜嘅可能會麻麻地。乾炒叉燒意粉話就話係乾炒但其實唔洗怕乾，佢個底都有啲汁可以撈下，同一般乾炒牛河無咩分別，都係幾油嘅。配料方面有蔥、洋蔥、芽菜同啲芝麻，都幾香口。叉燒有好多塊，而且係半肥瘦！好味！整體黎講兩份嘅份量都幾多，啱曬驚午餐唔夠飽肚嘅朋友，不過茶餐廳嘅食物多數比較濃味，所以食完會幾口渴。