大飯糖甜品小食屋 (已搬遷) 新店位置

食完晚飯口痕又想食野，友人提議到呢間大飯糖一試，話佢大份足料又有特色，一定要試下。剛好我地係附近搭輕鐵黎洪水橋試下呢間店，黎到門口見到門面坐無虛席，仲需要等位，不過我地兩個人好快就等到入座。我地本身都係芒果愛好者，坐低諗都唔諗就睇芒果專頁，不約而同都叫左芒果雪花冰配新鮮芒果肉、小丸子同牛乳雪糕。送到上枱果然無令人失望，份量都幾豐富，雪糕富有濃郁牛乳味，而且十分堅挺；小丸子好Q彈有咬口，配上新鮮香甜啖啖果肉，既滿足又透心涼。