大丼家 (已結業)

大丼家取大當家諧音，新開幾星期有唔少人幫襯，價錢唔貴，一心以為試得過，點知係大伏！所有item嘅通病係：1）細份唔抵食2）唔夠熱最伏係拉麵...先玩個找不同？粟米同菜都離奇失蹤。份量少得可憐，碗本身就好細好淺，湯都蓋唔過啲麵。溏心蛋變實心蛋，一望就知唔入流。湯底？飲落只似昆布湯加辣油，辣味不痛不癢，而且稀到水咁，公仔麵味精粉湯底都好過佢。加少少錢都食到味千喇，呢碗麵嘅質素同味千嘅差距明顯大於十幾蚊...睇圖你覺得一客有幾多隻？幾大隻？餃子皮又硬又油...三隻一口餃子。咖哩飯唔平平無奇，但亦唔平。咖喱味唔香，只係似豉油。炸皮太厚，麵包糠好少，所以唔鬆化。算係比較好食，但唔值$52。蕃茄湯幾濃。烏冬都唔粉，少少黏韌。海鮮雖多但唔新鮮，而且全部係白灼味。湯唔夠熱，芝士上枱都只係啱啱溶到。唔知遲啲會唔會進步，但餐廳位比較迫，食物份量少，員工唔夠服務普通，恐怕唔係咁易改善。