小草十八怪石鍋米線 (已結業)

呢間米線舖成日見關注組有人討論，而且評語都唔差，所以終於的起心肝黎試下，點知真係中咗大伏🫠。.餐廳係sell石鍋米線，配料選擇都算多，而且湯底都有幾多款，Menu睇落都算正正常常。當日嗌咗三款配料，有蘿蔔、墨魚丸同五香辣豬軟骨，配馬來肉骨茶湯底🫡。拿，呢幾樣餸諗住穩穩陣陣，點知個蘿蔔唔甜之餘竟然係酸嘅又有啲硬，未食過咁難食嘅蘿蔔，食左一舊就已經食唔到落去。🙃 其餘個兩樣餸尚算正常，但份量真係好少。而個肉骨茶湯底好明顯係用湯包開嘅，味道正常但真係冇咩誠意，唔知係咪味精太重，飲完喉嚨唔係太舒服🤢。.另外，想講下餐廳整體感覺唔太衛生。全部配料都係放曬係啲放題用嘅開放式雪櫃度。個雪櫃放係樓面，一有order職員就會係個度夾再上菜。但個雪櫃門基本上係長期打開，啲配料夠唔夠凍去保存就真係唔知，加上見到有啲烏蠅飛來飛去。🫣 而且眼見雪櫃入面有啲牛肉出曬血水浸住，唔知放左幾耐，見到都小驚。.其實呢間米線舖好似係主打自製石鍋米線，姐係比啲未熟嘅配料你放入石鍋自己煮。但係當日上菜嘅時候已經係煮熟曬係碗米線入面，心諗你唔比人煮就咪用呢樣野做招徠😂。呢間野真係不可一不可再，希望大家唔好以身試伏。