大力棒棒麻辣雞煲 (已結業)

用$1優惠食咗皇帝麻辣雞煲，無因為$1個而亂來！原來啲雞起哂骨所以叫皇帝雞。用嘅係新鮮雞，肉質鮮甜嫩滑，有黃油，又香又彈牙。啲汁明顯無咁杰，味無咁濃，食到麻辣之餘又食到雞味，難得！最怕故意用濃汁濃味去遮啲雪雞味。食完雞梗要加湯打邊爐！叫咗：本地牛頸脊，入口牛味大滿足，有咬口，越咬越有甘甜汁出來，又無渣，我覺得比和牛好食啲！牛胸油，經理大力推介！聽講一隻牛得幾兩，好罕有。以為好肥啦！原來一啲都唔肥，輕輕拖幾下，入口超爽脆，好濃嘅牛味但似食緊蚌。花甲公，原來同花甲係2回事，大隻好多，無沙之餘清甜到爆炸。花竹蝦，肉質扎實又鮮甜，一分$一分貨，海蝦完全無得揮！因為生日仲有個壽司旦糕送！真材實料仲好好味！環境舒服，新開未忙，慢慢坐都無催住走！露台仲有炭爐打邊爐！冬天一定要坐露台位。