大吉居酒屋 (已結業)

最近聽朋友講以前成日去食中環嗰間大吉放題轉咗做居酒屋，今日同媽咪過嚟試下先。基本上裝修都無咩點變，同以前差不多，只係menu轉咗，分為幾大類別，有沙律🥗、前菜、刺身壽司🍣、卷物、燒物、一品料理、食事同埋鍋物🥘。媽咪至愛食魚刺身，所以揀咗個油甘魚同吞拿魚刺身，入口軟身，非常新鮮，完全無半點腥味。我哋仲叫咗個軟殼蟹🦀沙律🥗，又鬆又脆，咬落亦唔會一口油，配埋沙律食帶點清新口味，蔬菜又新鮮爽口。鹽燒手羽外表金黃，表面焗得夠乾身，但肉汁依然保留，帶點點鹽燒香味，正呀！😍另外我哋揀咗店員極力推介嘅蟹肉🦀忌廉可樂餅，果然無介紹錯，外表炸到卜卜脆，粉漿唔會話太厚，咬開係熱辣辣嘅忌廉蟹肉，帶有少量可樂味，甜甜哋，味道好好，絕對值得一試。大家下次如果想同朋友搵間居酒屋食下嘢傾下計，不妨可以考慮下嚟呢度。