川味雞烤魚大王 (隆亨商場) (已結業)

今日一早同女友去左大圍，晏晝決定係附近食，OpenRice 附近見到呢間食烤魚，見好耐冇食就試下，餐廳唔難搵，因為去到已經差唔多3點，所以入面冇乜客，我哋叫左bb辣既烤魽魚（特大），要剁椒口味，加闊薯粉、萵苣、同黑毛猪肉片。個烤魚等左大約10分鐘左右就上枱，條魚已經炸到8、9成熟，所以只要開火滾一陣就基本食得，我當然迫不及待食左啲魚既邊位，好香口，炸得好脆，魚味都唔錯👍🏼， 平時食都係會叫鱸魚，今次第一次試魽魚，比想像中唔錯，魚都算大條，肉質都算鮮甜，又係得大骨，可以放心食，剁椒味都幾香，bb辣對我黎講啱啱好，整體唔錯，真心可一試😋 追加既闊薯粉、萵筍、同黑毛猪肉片就正常發揮，黑毛豬都算唔錯，西班牙豬係唔同啲，肉味濃郁，有咬口，如果份量多啲就更好。唯一美中不足，係個萵苣切得太大粒，搞到要煮勁耐，如果係切片或者切條就更貼心。