熊野日本料理 (已結業)

家住大圍，日日經過村南道見到有新餐廳開張當然唔放過，尤其見op仲未有食家寫過食評～就由小女子開辟大地啦 --------------------- 呢度裝修喺大圍區都算特別，因為喺正街角，客流多一定留意到，但同時外觀比較暗色平實，所以整體外觀感覺相對內儉 第一個黎寫緊係要比啲誠意叫lunch menu最貴果樣lol~~（其實係自己想食⋯）就黎個「刺身定食10切」啦！呢度lunch set 都配有味噌湯、沙律前菜同日式蒸蛋，雖然無飲品但都有日式熱茶（雖然店員加茶速度較慢，但都同客多有關嘅） 「刺身定食10切」（$138） 上菜時係有驚喜位嘅，因為刺身冰盤上，仲有唔少裝飾，睇得出有用心製作～加上店員指原來壽司同刺身set款式係日日同個個唔同嘅，雖然未考證到，但如果係嘅都幾有新鮮感 今次有：三文魚（肥而不膩，有足夠魚油）、鱆紅魚（薄切爽口，不過相對細塊啲）、鯛魚（好鮮甜，有口感，果然係當造5月魚類之一）、吞拿魚（都算頗厚切，無咩筋，入口幾嫩滑）同埋甜蝦（好新鮮～有蝦羔而且好甜） 至於其他小食，蒸蛋做得特別好～完全唔老好滑好滑，而且入面都有菇同海鮮粒，做得好好（唯獨蝦粒無挑腸）