睿和牛燒肉 (已結業)

大坑一向都有好多唔同種類既餐廳，之前朋友試過睿居酒屋覺得唔錯，所以今次試埋隔離間和牛燒肉，餐廳位於橫街入面，好有日本隱世居酒屋既感覺。燒肉店坐位唔多，有4張枱，如果黎食都係book 定穩陣啲。前菜- 支豆 $28支豆用醬油煮過，好入味，食既時候好易將殼豆分離。鱈魚魚干 $68魚干烤到好香脆，係好好既佐酒小食。冰頭甘醋漬 $78侍應介紹係三文魚頭軟骨既時候都覺得好新奇，估唔到食落又幾好食，口感有啲似蒟蒻，比較有咬口，配埋香橙同醋調味，酸酸甜甜，好開胃！深海池魚薄切 $268每塊池魚厚薄均勻，睇得出師傅既刀工，口感比較爽口，配左香蔥柚子醬汁同wasabi 醬，店員推介自家製既柚子醬汁，酸酸地，好清新。雜錦壽司盤（10貫）$588由於同居酒屋相連，所以係燒肉店都可以食到壽司，而且都幾高質。赤貝鮮甜爽口，帶子大大粒好厚身，大拖羅色澤粉嫩，完全無根，入口即溶，魚脂香濃。赤身肉質比較實在，無油脂，魚味比較濃。鯖魚係冬季既時令刺身，當造既鯖魚魚脂豐富，肉質細嫩，相當肥美。甜蝦肉質鮮甜， 油甘魚、深海池魚同鯛魚都係白身魚，味道較淡，建議先食，個人比喜歡深海池魚，肉質爽口略帶點魚油香。海膽反而較為一般。