Homeland (東昌街) (已結業)

今日去大埔踩單車，見到好多人推介嘅呢間💛店，於是提早左15分鐘去排隊，但係都已經有一兩組人等緊，最後舖頭未開都已經有四五組人等等，所以建議大家早少少嚟！Menu上面好多款都好想試，見到後面果枱叫左漢堡都超級吸引。澳洲黑毛安格斯西冷（medium rare)肉質嫰滑，有連少少筋（我鍾意食！），肉味都唔錯，點埋個肉汁一齊食就仲正。另外個薯蓉好香，入面有保留返少少薯仔粒，所以有啲咬口，非常好味。加購左薯條配黑松露蛋黃醬新鮮炸出嚟，熱辣辣，每一條都好粗，有好多薯蓉。個黑松露醬調得好好，黑松露味香濃，十分推介！秘製伊比利亞卡邦尼意粉同平時食嘅意粉唔同，因為係手工意粉，有意粉嘅煙韌，比一般意粉粗，好特別！吉穿隻蛋之後撈埋啲意粉一齊食，開頭可能會以為唔夠味，但係連埋啲火腿一齊食個味就剛剛好！提一提大家，餐飲叫左咖啡，餐廳會幫你加埋奶，如果想走奶嘅話記得同餐廳講。整體而言，每樣食物嘅味道都好好，睇得出餐廳有用心去整每一道菜，份量好足，誠意十足！下次會試佢嘅漢堡。最後大家仲可以入去買連豬利是封🧧，自己都買左一套，一長一短（$50）。