象月-泰式休閒餐廳 (已結業)

好耐冇黎大埔區，見完朋友之後周圍搵嘢食，先發現大埔舊墟原來有一條食街，兩旁都有好多唔同嘅小店，最後揀咗呢間好似新開嘅泰式餐廳。先來個生蝦刺身，雖然得六隻，但每隻蝦都幾大隻，啲蝦好新鮮及彈牙。冬陰公湯味道唔算辣，酸味同辣味個比例都幾好，有成三隻蝦，另外都有好多唔同配料，令到湯嘅層次感更加豐富。飛天通菜其實係辣椒炒菜，越食越會覺得辣，食唔到辣嘅唔好點呢個菜。炸蝦餅係我最鍾意食嘅泰菜之一，蝦膠打得唔錯好彈牙，炸得亦都非常好。泰式串燒，豬肉彈牙有咬口，雞肉十分之嫩滑，牛肉味道都唔錯，不過嗰醬好似唔係串燒花生醬，如果唔係會更加好食。最後叫咗個咖喱炒蟹，隻蟹好大隻好足料，亦都好肥有多膏，個黃咖喱炒得幾香，食完晒蟹先至發現仲有好多咖喱汁，再叫咗個薄餅加埋咖喱汁食就一流啦。可能係新餐廳嘅推廣，只係社交媒體Like 就會送甜品啦，可能係送嘅甜品不過不失。