Good Boy Restaurant (已結業)

一上到去，裝修非常簡陋，廚房係open kitchen所以油煙非常大。只係得老闆一個人搞掂晒樓面/廚房/收銀。一坐低，連正常Menu都冇，叫我睇網上個外賣menu… 同朋友叫左兩個burger，一豬一牛。因為人手得一個嘅關係，好明顯落餐出餐根本零個System可言。老闆見邊枱客投訴出餐慢，就做咗嗰枱客先。最後我朋友個牛burger等咗40分鐘，我就等左1個鐘，lunch hour過晒都未食到… 你以為等咗咁耐，會有好野食？我個豬burger鹹到要洗腎，沙律菜一啲都唔脆唔新鮮… 識我嘅都知我係薯條控，而佢Menu都明明寫住burger餐會跟薯條。但到我嘅時候，我唔知佢係咪冇晒薯條啦，喺冇人同我解釋過嘅情況下，我只係收到兩條（係兩條！）薯條，佢另外俾咗一堆類似炸麵包嘅嘢我，但完全食唔落口嘅。由於我已經遲咗返工，淨係想嗱嗱臨走人，叫買單嘅時候竟然係冇單嘅，老闆就咁行埋嚟口頭話俾你聽幾錢，然後就PayMe。我地兩個burger埋單要$480 (佢話已八折)。Openrice上面啲好評，唔該俾少少良心好冇？講完。