河內越式料理

營業中

休息中

河內越式粉麵之前已經食過，味道唔差，大大碗夠抵食，今日去開附近用咁啲消費券買野，之後就黎食lunch。哩度除左越式粉麵，仲有法包、飯、沙律、米紙卷、野飲等等，全部幾十蚊有交易。一坐低，侍應就送黎兩杯龍眼水黎，冇錯，佢唔係熱茶，係龍眼水黎架，雖然唔似龍眼冰咁加左糖咁討喜，不過龍眼味都好香，重點係唔洗錢呀～！！龍眼冰(跟餐加$12) - 龍眼冰好清甜，入面有超多龍眼，數過有十幾粒，非常抵飲！熱情果冰(跟餐加$12) - 熱情果糖漿同梳打水係分開上，侍應會原罐梳打水上枱，所以倒左落杯實際其實有1.5杯，熱情果冰酸酸甜甜好啱悶熱天氣飲。極品牛三寶湯河粉($69) - 湯河好大碗，入面有生牛肉、牛腱同牛丸各二，湯底係南越風味，顏色比較深，味道濃甜，但食完又唔會覺得口渴。河粉幾薄幾滑，粉量亦都多，細食嘅話一碗都夠兩個人食。牛肉上枱時仲係生嘅。牛腱好腍，牛肉雖然比較細粒，不過都好彈牙。會安雞絲撈檬($58) - 雞絲同檬粉份量都多，檬粉幾滑幾彈，加埋酸汁食好開胃。越式豬頸肉($29) - 豬頸肉燒得幾靚仔，邊位焦香中間仲好軟嫩，蘸埋個酸甜醬食唔錯。越式炸蝦餅($29) - 蝦餅幾彈牙，炸皮唔會太硬。