夏麵館 (活@KCC) (已結業)

因為工作關係，有段時間我地成班同事會係夏麵館食lunch。因為佢啲餐份量多味道正常，價錢唔太貴，都不失為lunch好選擇。老上海炒麵平時都係叫開湯麵多，第一次試呢款炒麵。呢碟比起平時等候時間耐好多，不過都值得，因為上碟至我差唔多食完個陣，成兜麵依然係好熱。炒麵鑊氣幾足，每條粗麵都炒至醬油啡色，上色均勻。入口唔會太鹹，呢碟加入咗好多條小白菜一齊炒，食完令自己覺得好似無咁熱氣。呢碟麵份量真係好多，盡力食都仲係有剩，建議同人開心share。唯一要挑剔嘅係食落太油，雖然炒麵好難避免，要炒香要落一定份量嘅油，但呢碟比我感覺係每口都有好多油，唔夠乾爽，如果改善到就錦上添花啦。熱豆漿通常跟餐我地成班同事都習慣叫熱豆漿，而我自己本身都好鍾意飲豆漿，但就好驚唔夠甜味嘅豆漿。夏麵館跟餐熱豆漿印象中唔使加錢，每次飲完成個身暖哂，天氣轉涼個時特別鍾意飲返杯。味道而言，甜度適中，唔會過甜，帶有淡淡黃豆香味。