呂仔記 (已結業)

工作關係入左筲箕灣一轉，至四點終於走得，未食午餐少少餓，但七點又約左人食晚飯，打電話同住附近的朋友求救，問有咩好食！咁佢都係指我去東大街，因為就快又食飯，佢建議我掃下街就算！本來揀雞蛋仔，點知去到休息，咁最後就去左食呂仔記了～呂仔記主要係賣小食同糖水，即係魚蛋燒賣粉果魚肉生菜碗仔翅o個d，糖水就係中式的，即係芝麻糊o個種！咁我要左 魚肉燒賣 ($26/8粒)等左一陣就見到姐姐拎俾我啦！用紙盛著的燒賣粒粒都有成吋咁大粒，以金黃的燒賣皮包著，淋上醬油～食左第一啖就知同其他的燒賣的分別，質感好實淨，食得出入面係好多好多魚肉，沒有一般的粉感，估計每粒有八成以上是魚肉，有魚鮮味，味道真係唔錯！不過八粒真係有點飽，後來先知可以叫半份（即四粒）！嗚嗚！等待期間，望到牆上殘舊退色的剪報，原來燒賣是老闆用每天買來的大黃鱔起肉製成，難怪口感同味道都同街外的不一樣。平時食開溝左粉的燒賣，雖然係平，但都無咩味，呢度每口都食到真材實料，成件事變得值得一試。