峰手撕雞 (鴻運中心)

營業中

休息中

見到$35以為好吸引，原來要有制服誘惑先至有得平。最後冇優惠都唔緊要，俾咗$45買個飯，份量細到我要另外再喺屋企搵嘢食先至夠飽。巨人大碗飯？如果真係有巨人我都擔心佢營養不良。我插咗隻叉落去一啖都未食，即時火都嚟，已經好肚餓，買完飯返到屋企得嗰幾啖，個盒正正常常，但係睇到根本只係裝得一半。咁嘅份量收$45，如果個盒滿嘅話係咪收$90。我見呢間舖對自己嘅出品咁有信心收咁貴，影完張相我都試一試，雞唔入味，口水雞個汁同買樽裝嗰啲差唔多。真心想知呢間舖嘅賣點係咩，我見其他食評有人話價錢唔平但係味道好味？我諗公道自在人心，收點嘅價錢就俾返點嘅質量，既無質又無量，就...。以上係我個人主觀感覺啫，等其他人去評價。