大少爺茶餐廳 (已結業)

睇完樓下兩篇對海南雞飯高度評價0既食評, 又0黎湊0下熱鬧, 今日0黎試試呢度的泰式海南雞飯($52).坐低order 完係2 分鐘就有得食... 先飲啖冬瓜湯, 好「住家」0既味道, 相信即使有人造味精都係少之又少, 唔錯; 雞已去骨, 一見大部分係雞翼位置, 大喜! 食落係新鮮雞的味道, 肉質唔算好滑, 不過絕對唔0鞋的; 雞皮就最正, 滑滑的又雞味濃郁, 可惜個別有幾塊幾厚又黐住一舊舊肥膏, 唯有自行咬掉佢. 油飯粒粒分明, 唔係咁油, 好在幾香, 而且加少少酸酸辣辣的醬汁0黎食, 都好滋味. 雖然我偏愛新加坡式海南雞飯, 始終泰式同新加坡式亦有少少分別, 但乜式都好, 今次呢碟海南雞飯絕對係我so far 0係香港食過最好食的海南雞飯(連一向覺得已經好掂的好時都要行埋一邊), 極力推介!環境ok, 雖然non-卡座位密密麻麻, 但梳化椅都坐得舒服, 而且呢度似港式西餐廳多過茶餐廳, 好乾淨企理又完全唔嘈; 招呼就無乜特別.食完係開心得想大笑, 一定會再幫襯食海南雞飯!