影片
更多
2010-07-28
84 瀏覽
在下第一次參加試食會，首先要多謝金田長壽司同openrice搞依個function!!! 環境：金田長個水牌好大，遠一遠都睇到，所以唔怕蕩失路，不過大家要行幾級樓梯既。當日 T3 落雨，好彩扇門係電動既，唔係我兩手都係野會狼狽。餐地方唔算大，裝修簡單，光線柔和。雖然佢冇房，不過都為是次活動間開左個corner，放兩張枱比我地試食團開餐。更為我地製作一系列既試食菜式（廚師用左成個月諗架！）。埋位坐低見到個精美既試食menu（老板話係個team親手造架）有少少感動，因為覺得好認真，自己有少少貴賓feel添，hehe。服務：全晚最落力當然係老板Tommy哥哥，成晚講解食物來源，創作概念，完全冇冷場。要照顧一個大party其實係好吃力架，不過見到老板assign左成 team人黎服侍我地，睇得出佢好有誠意。所有人都好努力，而且態度誠懇有禮，只係有幾個廚師個樣比較嚴肅。不得不提：好多時我個位會有好多垃圾（乾紙巾，濕紙巾，骨），不過因為工作人員效率高，所以都好快變得好乾淨，讚。味道：Welcome drink: （一埋位哥哥仔就走過黎話比我地知，為歡迎我地，一人會有一杯特飲：A) 北海道牛乳雪葩
環境：
金田長個水牌好大，遠一遠都睇到，所以唔怕蕩失路，不過大家要行幾級樓梯既。當日 T3 落雨，好彩扇門係電動既，唔係我兩手都係野會狼狽。餐地方唔算大，裝修簡單，光線柔和。雖然佢冇房，不過都為是次活動間開左個corner，放兩張枱比我地試食團開餐。更為我地製作一系列既試食菜式（廚師用左成個月諗架！）。埋位坐低見到個精美既試食menu（老板話係個team親手造架）有少少感動，因為覺得好認真，自己有少少貴賓feel添，hehe。
服務：
全晚最落力當然係老板Tommy哥哥，成晚講解食物來源，創作概念，完全冇冷場。要照顧一個大party其實係好吃力架，不過見到老板assign左成 team人黎服侍我地，睇得出佢好有誠意。所有人都好努力，而且態度誠懇有禮，只係有幾個廚師個樣比較嚴肅。不得不提：好多時我個位會有好多垃圾（乾紙巾，濕紙巾，骨），不過因為工作人員效率高，所以都好快變得好乾淨，讚。
味道：
Welcome drink: （一埋位哥哥仔就走過黎話比我地知，為歡迎我地，一人會有一杯特飲：A) 北海道牛乳雪葩忌廉梳打特飲；B) 檸檬雪葩可樂特飲）
北海道牛乳雪葩忌廉梳打特飲：因為個名high啲，所以就揀左佢。 當Tommy哥哥同我地寒暄時，佢解釋個特飲係忌廉溝鮮奶既進化版，由普通既忌廉梳打加左一小塊北海道牛乳做既雪葩做成既。小弟見識少（其實可能係年紀尚輕），未聽過忌廉溝鮮奶，所以飲落試倒帶少少奶味既忌廉，覺得幾得意。個奶味其實係越飲越濃，因為個雪葩溶，個北海道牛乳味先出黎，真係幾有諗頭。因為天氣熱，所以覺得杯飲品可以再涷d，Tommy哥哥話會鑽研下。
（食物到前，小弟同隔離兩位食評研究餐廳個名：唔知大家有冇留意， “金田”既英文名並非日語拼音既 “Kaneda”，而係粵語拼音既 “Kam Tin”，mmm… 好有港式味道bor，唔知係咪代表支持本地創作呢。既然佢用得 “long” 黎做英文名，好明顯個 “長” 字係點讀啦。）
創意前菜三味：三文魚皮三吃，口感完全不同，各有特色，送酒一流。
泡菜三文魚皮（圖左）：從來未食過，三款中最特別，韓日fusion，覺得係一個幾大膽既嘗試，不過意外地幾好食。未入口以為會食倒魚鱗，不過好彩冇。魚皮口感似粉皮， Kimchi濕濕地幾醒胃，不過味道可以再辣D。
炸三文魚皮（圖右）：夠薄，所以炸得好脆且唔油，好似食緊薯片咁。味道如果濃返少少就更加好。
燒三文魚皮：最夠味既一款，脆脆地。魚皮下面有個好light既salad，個配撘幾好。
四大拳頭刺身拼盆：大得精彩
珍寶北海道牡丹蝦皇刺身：Tommy哥哥講解原來除左鮑魚之外，其他食物都可以用 “頭數” 黎計。鮑魚就以每斤量頭數，咁蝦呢就用每kg黎計。當晚食倒既蝦係最大頭既，大到我地要用刀叉黎食。蝦身嫩中帶爽，不過好似有層薄薄既黏膜包住，建議起蝦殼時可以 “劣一劣” 層黏膜。蝦唔算超級鮮甜，不過因為隻蝦本身大，本人又係第一次食，好難同其他種類比較，所以唔可以公平比分。
三文雪花腩刺身：拼盆中最好食既一味。其實size並不細，不過因為拼盆其他食物太震撼，相比之下就覺得唔夠口。肉身嫩滑鮮甜肥美，全晚最出色。
珍寶北海道帶子壽司：小弟口細，所以選擇繼續用刀叉黎食個帶子壽司，好似食西餐咁。分開幾口食，重以為自己食左幾客添。帶子肉質嫩滑細緻，味道熟少甜而唔腥所以覺得新鮮。
北寄貝壽司：本身唔係一個北寄貝fans，所以好少食，不過見倒成隻北寄貝包住舊飯，覺得一定要試下。比較乾，只可以話依道餸 “唔係我杯茶” 。
爐端燒：
（每道餸出黎時，一定會比足夠時間我地影相，好多時我地重會用成5分鐘，所以有好多食物送到入口已經唔熱，個人覺得好難對食物公平比分。建議下次試食會可以先用一碟黎比人影相，其他可以親熱食。）
銀鱈魚西京燒：載住銀鱈魚既琵琶碟好別緻。雖然銀鱈魚入到口時已經唔熱，不過完全唔腥，重好鮮甜。魚肉嫩滑香甜唔油膩，碟上配上醒胃清新既salad，好滿意。Tommy哥哥見我地碟salad清得咁快，重另外比多兩碟我地添。
鹽燒牛脷：Tommy哥哥稱此部分為 “牛脷腩”，乃牛脷較lum近tip之部位，牛脷躉? 牛脷唔算厚，又唔算薄，ok爽口，不過比相機哂到涷哂，鹽燒味道可以再濃d。
特式壽司：（配上生磨既wasabi，尤其欣賞，讚！）
8吋海膽壽司：全晚最期待既一道菜式。因為海膽容易散，所以師傅利用蒟蒻去固定海膽喺紫菜上既位置，真係估佢唔倒，創意十足。不過好可惜，個樣就好得啦，問題依然存在，都係一夾就散，食佢幾有難度。用左蒟蒻，海膽既味道大大削減，食唔倒任何鮮甜或海膽本身既味道，有少少失望。
藍鰭吞拿魚腩壽司：咁長既壽司都係第一次食到。雖然係比較薄，不過份量十足。依圖指示，長壽司既食法係卷住黎食，真係非一般既食法。Marble既魚紋所見，吞拿魚腩肥美，溶喺口既感覺好正。如果魚既温度可以涷多少少就更加好。
和風炸物拼料理：炸蝦天婦羅拼明太子雜菌
炸蝦天婦羅：蝦係越南黎既虎蝦，肉質甜而爽，不過tempura個外層雖然鬆，但係太過似麵包糠加漿粉，又厚又油。個tempura汁冇跟到蘿蔔蓉，所以冇減到個熱氣感。
明太子雜菌：明太子為餐廳主題推介。本身對明太子有少少恐懼感，因為覺得佢好咸，不過今次師傅用牛油，忌廉加埋雜菌去中和左個味道，感覺香d同light左，易入口好多，幾啱我個人口味。
和風料理：
特大馬刀貝味噌煮：所謂馬刀貝，其實係我地食開既蟶子；而味噌煮係用左三種唔同既味噌（甜味既西京味噌，赤味噌，用作湯料既信州味噌）溝埋一齊淆既。嘩，好大隻呀！如果淨食白雪雪部分係非常之鮮甜爽口既。不過，Sorry，馬刀貝內竟然發現疑似腸臟既物體，當問師傅時佢解釋係膏就當然放心食啦，點知押之餘重有沙既！全晚最失望既時刻，亦係味道及衛生分被扣分既主要原因，希望廚房加以留意。
甜品：配撘新穎，味道清而不溜，為晚餐劃上完美既句號。
雲呢拿海膽焦糖燉蛋：第一次食帶咸味既焦糖燉蛋。焦糖燉蛋好滑，不過可能海膽味太重，食唔倒雲呢拿味。個idea幾得意，又係一個good try。依個甜品令我諗起而家好流行既分子料理，好大膽既嘗試。
日本絹豆腐慕絲杯：絹豆腐來自日本，個慕絲味道好似未加糖水既豆腐花，不過個口感唔同，好清好健康，面頭件芒果比d甜味佢，所以好正，我鍾意。
紅豆配忌廉：真材實料既紅豆甜而不溜，個忌廉好light，好欣賞佢以忌廉個foam黎送個本身嚡嚡地既紅豆。
今次一毫子都唔洗出就可以食咁多野，好難覺得唔低食bor 。
張貼
