新麻蒲 BBQ (波斯富街) (已結業)

本人大愛爐邊蛋，好多時選擇韓燒餐廳都匆住爐邊蛋而去，今日就黎位於波斯富街既新麻浦。接待我地既係2個位好有禮既韓國人店員，男店員廣東話講得好好，女店員英文亦不錯。佢地既爐邊蛋同樣係會加埋泡菜，泡菜份量剛剛好，唔會蓋過蛋香，再refill既時候就只有蛋漿，可以食到蛋既原味男友出哂名係牛魔王，牛肉絕對唔少得，就叫左牛肉套餐🐂包括有特級霜降牛肉、秘製牛肋骨、LA牛肋條、雜錦拼盤同部隊鍋。霜降牛肉係我地心目中既NO.1，油脂分佈平均，入口後慢慢滲出油脂，由於冇醃製過既關係味道較淡，可以點佢地提供既醬汁，而我就覺得咩都唔點最好食👍🏻秘製牛肋骨相比起霜降牛肉多筋，但都只係好少，整體口感都幾好，醃料味道獨特，燒完帶有小小焦香。LA牛肋條同樣都係醃製過，味道偏甜，配埋生菜包住食最好。套餐仲有2隻大蝦，雖然見唔到蝦膏，但食落就有陣陣蝦膏味，蝦肉爽口彈牙👍🏻枱上仲有另一個爐比我地煮部隊鍋，裡面有大約半個辛辣麵、牛餐肉、年糕、金菇、泡菜等等，好開胃。食物好快就上齊既關係，手同口都好忙🤣🤣