大自然素食

營業中

休息中

聽聞大自然素食的食品又多款又好味，今日就去試下係咪真係咁得先。餐牌有唔少選擇，仲有一個係日式食品的餐牌，睇落完全唔覺得係素食。見到好多檯都有叫壽司，當然都要試下味道如何。珍味魚翅壽司 / 粟米壽司 / 鮑魚壽司 - 三款壽司味道都唔錯，只係鮑魚壽司口感差少少，而個重點係酦薑都好好味，wasabii 都好夠辣。原隻木瓜蟹籽沙律 - 木瓜唔大，所以蟹籽沙律唔算多，而味道都同一般蟹籽沙律分別不大，加上木瓜夠甜其實都幾好味，但真係得一至二人分量。軟殼蟹卷 - 味道都唔錯，而且都落足料，無論賣相同口感都真係唔似食素。豉油皇雜菌炒麵 - 炒麵質感一般，炒得都乾身但個麵有部分係一pat pat 而唔係一條條，豉油皇味唔算太咸，味道可以接受，但下次應該會叫其他款式。另外仲有送綠豆沙，味道唔會太甜，相當唔錯。整體而言，價錢唔算平，要茶芥加一，但食物同環境等質素都可以接受。