金船長餐廳 (已結業)

難得黎到大角咀食飯，唔想再去奧海城，但又想搵間靜靜地嘅餐廳，路過金船長，見入面黑黑地，幾有情調就入左黎。餐廳入面嘅裝修有啲船上風格，上面有啲魚網裝住啲海鮮模型，主題呼應返餐廳個名。本住set一定抵啲嘅諗法，見到有dinner set 就毫不猶豫咁嗌左。海鮮蕃茄湯，味道普通，蕃茄味略嫌唔夠fresh，海鮮都見到嘅。主菜嗌左個燒紐西蘭羊架配薄荷燒汁，5成熟。煎得一啲都唔韌，羊肉令人難以接受嘅膻味都冇乜，加埋燒汁食，唔錯！因為同友人過黎食，另外都有嗌多個主食，炸軟殼蟹南瓜意大利飯。軟殼蟹炸得勁香，不過南瓜味略嫌唔夠，如果可以見到有南瓜蓉係度會更好。另外，餐廳必點嘅黑松露菌醬意式馬斯卡普芝士夾心比薩，一上枱就已經切好一塊塊比你。上面佈滿芝士粉，加埋黑松露嘅香，係超正！除左就咁食，餐廳仲有推薦其他兩種食法，都幾得意，可以嘗試。甜品方面，心太軟朱古力布旬。擺盤好靚，都做到心太軟必有嘅流心效果。金船長梳乎厘揀左薑汁味，真係食到濃濃嘅薑汁味，加上勁有空氣嘅口感，係surprise嘅出色之作。宇治抹茶紅豆奶昔同凍檸水，解渴。