石一燒 (富多來新邨一期) (已結業)

雖然天氣咁熱，但係都好想食鐵板燒，今日就跟朋友去咗大角咀呢間石一燒。 我哋兩個人就叫咗佢個二人餐尊上の二人前。首先上菜嘅係沙律，落咗芝麻醬同木魚，既消暑又開胃。然後係櫻花蝦味噌湯，為一般嘅味噌湯增加鮮味。前菜有甜薯、姬菇、帶子裙邊，分別用甜、酸同辣味刺激味蕾，甜薯炸咗小小變得香口，姬菇帶少少酸，口感彈牙，帶子裙邊加咗番紅花調味，辣得嚟爽口。嚟到主菜石板燒，餐廳先放啲洋蔥俾我哋炒香咗先。之後先落美國頂級牛小排，唔需要整太熟就可以帶出做到，食落好重牛味。英國羊西冷唔會太騷，咬落去肉質好腍。日本豬梅肉食落甘香，好多肉汁，油脂感充足。菇盛會有幾種唔同嘅菇，全部都非常之爽口 juicy。炒到咁上下，洋蔥都開始好甜，可以當配菜食。套餐配白飯，落咗紫菜粉同芝麻調味，配燒肉或者就咁食都好好食。天氣咁熱，我哋仲叫咗蘋果同蜜瓜梳打汽水消暑，之前冇飲過呢隻牌子，好清新，果味十足。最後甜品係自己撈嘅綠茶雲呢拿雪糕，食客要自行調配綠茶，在倒响雪糕上面，雪糕嘅甜味中和咗綠茶嘅苦澀，同時又有綠茶嘅香味。臨走之前侍應仲貼心提醒我哋餐廳有衣物噴霧供應，唔驚一陣燒肉味。