臺茶•薈 (已結業)

近排發現公司附近開咗間新嘅台式餐廳，望落門面幾有小清新嘅味道，啱晒我呢啲偽文青。特登同同事約好唔帶飯，一齊出去試下新野。黎到門口帶位姐姐好Nice，主動問我地要唔要坐樓上，樓上空間大啲舒服啲。呢度鋪位細細，原來有兩層！上層都幾闊落，有梳化坐仲有啲小咕𠱸，幾有台灣café嘅感覺。我地一行兩人叫咗兩碗紅燒牛肉面，同埋一客鹽酥雞扒，跟餐加$5可以揀台式特飲。我就叫咗仙草奶茶，朋友就叫咗珍珠奶茶~夾埋都只係大約$140，係天后呢區黎講咁嘅價錢都算唔錯喇。紅燒牛肉麵湯底相對比較清淡，麵呢就選用咗陽春面，麵質都唔錯。牛肉夠淋而且肉嘅分量都幾多下，不過我覺得最驚喜其實係碗麵入面嘅蘿蔔同鹵蛋 夠晒入味，正啊！另外鹽酥雞扒味道都唔錯、夠乾身，我就最怕食到啲又熱又油淋淋嘅炸野，呢度嘅鹽酥雞扒其實唔錯，唯一係份量就相對細份咗少少咁，不過碗面都已經好夠飽。見隔離枱食肉燥飯，大大碗幾夠香，好似幾抵食咁，下次再黎試下先。