龍城金記海鮮火鍋

營業中

休息中

這天忽然氣溫下跌好鬼想打邊爐囉，仲要早收工即刻約腳啦，老友都住東九龍約在最多火鍋店揀的地方九龍城聚頭，老友話龍城金記啲嘢好新鮮喎一於去嗰道啦，先點個滋補蟲草花雞和胡椒豬軟骨湯底，兩個湯都好夠味尤其蟲草花雞係賣飛佛呀。整個生牛肉刺身嘆吓先，附上洋蔥及店方特製汁醬一齊，肉地好淋身又滑溜，不過牛味就不夠特出。另外叫咗花竹蝦和南非鮑魚刺身，這盤有三隻大蝦和兩隻鮑魚巳夠我哋5人共食。花竹蝦刺身入口好爽又彈牙，新鮮好味道，鮑魚刺身就較煙韌要出多啲牙力才可好好欣賞。混一個醬預備開餐。雞子係新鮮貨絕不是雪藏貨可比，嫩滑香濃的雞子食落似豆腐咁正，呢晚我哋食咗兩碟呀。脆鯇腩質地好札實，魚味香濃油份充足好好味。仲有超推介的豬紅，好耐冇食過咁正嘅豬紅，咬落滑身味道香夾濃，後悔叫得一碟因為再叫已經賣晒。手切肥牛肉味好唔錯，輕輕一灼入口軟淋男人恩物。