真味鮮廚 (已結業)

放假去咗觀塘做facial之後走咗去搵附近返工嘅朋友食晚飯，本身想食放題但朋友話天氣凍不如食打邊爐，見到真味鮮廚有任飲任食海鮮火鍋而且價錢唔貴，所以我哋就轉咗場😊刺身有三文魚、帆立貝、吞拿魚、八爪魚、牡丹蝦同鮑魚👍🏻重慶雞煲幾惹味但為咗留肚食海鮮我哋都唔敢食得咁多雞🤣海鮮可以喺肉蟹同龍蝦當中二選一，懶得剝殼嘅我哋梗係揀龍蝦啦😊聖子同埋白鱔都係我好鍾意食嘅海鮮，海鮮全部都大大隻，淨係食海鮮盤都半飽🤣特級安格斯肥牛牛味濃而且幾嫩滑但我哋覺得略嫌肥咗少少😊巨型水餃皇真係好大隻，餡料飽滿仲有大大隻蝦肉，可惜每人得一隻🤤任食嘅配料種類唔算好多款，不過味道都唔錯，香脆響鈴同魚皮、彈牙蝦滑、有流心芝士嘅芝士竹輪卷😍任飲嘅飲品除咗啤酒汽水之外仲有自家製嘅清甜竹蔗茅根水❤️❤️