誠拉麵 (已結業)

天氣愈來愈凍，凍到唔多想郁，但又要出去食晏。唯有同同事以龜速行去最近嘅food court，食碗熱拉麵。好多拉麵店，但呢間新開個零月又從未食過，所以揀左。我要左味噌湯底拉麵（特），好大碗，有紫菜三塊、玉子一隻，加三大塊叉燒。然後追加小食煎餃子。同事就食白豚湯拉麵（正），份量少D，但都有齊紫菜、叉燒同玉子，追加明太子雞翼。大家夾起麵一睇，原來麵底都唔同嘅。我嗰碗係有加鹼水嘅曲拉麵，不過全全無鹼水味。同事嗰碗就係直拉麵，本身無加鹼水。兩款麵都夠軟熟。而小食餃子皮薄餡多，啖啖好食。明太子雞翼亦啖啖肉同明太子，又香又辣，鐘意濃味嘅人會好鐘意。一邊食，仲可以一邊睇火炙叉燒表演。