西米Go

營業中

休息中

天水圍真係唔係好多甜品選擇，個人最喜歡呢間「西米Go」，款式夠多之餘，位置亦鄰近西鐵站相當方便。是日夜收工又未食飯，唔想食咁飽之下，一於買盒撈冷麵、兩碗糖水，再加太太最喜愛嘅雞蛋仔，返屋企慢慢嘆。三餸冷麵 :揀咗螺肉、八爪魚及粟米粒，三款餸鋪得整整齊齊係冷麵上面，賣相唔錯，食落份量都幾多，兩個人食都夠，胡麻沙律醬好香，小辣之下相當惹味。原味雞蛋仔 :雞蛋仔外脆內軟，每一粒都好飽滿，食落有陣陣蛋香。檸檬百香果爆珠愛玉梳打 :金黃色嘅賣相好吸睛，飲落味道酸酸甜甜，愛玉凍口感Q彈，每一口都飲到，炎炎夏日飲份外清涼。芒果特盛豆腐花 :呢度嘅芒果系列係特別推薦，除咗有芒果粒外，仲有芒果爆珠及小丸子，份量滿滿，芒果汁底鮮甜，配上滑滑嘅豆腐花同煙煙韌韌嘅小丸子，口感有層次。椰汁紅豆芋圓珍珠河粉撈 :有齊紅豆、芋圓、珍珠同河粉，非常豐富，椰汁好香，河粉滑滑有咬口，每樣配料都好夾，感覺好滿足。