影片
更多
2023-11-25
30 瀏覽
天鳥居酒屋 Tentori Izakaya📍天水圍天華路33號T Town North 2樓N212號舖朋友呢日又返晏，入咗嚟天水圍搵我食早餐，一般港式嘅早餐我哋都食得唔少，今次就想試吓喺T Town商場入面搵下有無啲特色早餐食，估唔到又真係俾我哋搵到喎。我哋喺呢間居酒屋嘅門口睇到有早餐嘅餐牌，即使係週末價錢一樣咁經濟實惠，睇過啲嘢都幾啱食，於是我哋就揀咗喺呢度食早餐啦。 💰$32炭烤雞扒手打烏冬 🍜朋友一向比較鍾意食粉麵，所以湯麵餐我就俾佢揸主意。湯底揀咗魚介湯，配菜就揀咗炭烤雞扒，麵底就梗係呢度比較出名嘅手打烏冬啦！雖然係早餐，但係佢嘅份量同午餐都差唔多，亦都有昆布做配料。炭烤雞扒好香炭燒味，雞扒肉質偏淋；魚介湯底味道濃香，早餐食呢個夠晒醒神！如果唔想揀咁日式嘅配搭，都可以選擇米線或者出前一丁呢啲比較港式嘅口味，當然你都可以選擇拉麵做麵底啦。佢有多達八款嘅食材俾你配搭唔同類別嘅麵，湯底亦都有兩款，有辣有唔辣，任君選擇，自由度非常高。 💰$32吉列雞扒飛碟 🥪呢份吉列雞扒飛碟真係厚到無朋友，飛碟機壓過嘅地方非常香脆，裏面夾住生蕃茄、生菜、酸瓜沙律醬、同埋主角吉列雞扒！炸過嘅烤雞扒依然
📍天水圍天華路33號T Town North 2樓N212號舖
朋友呢日又返晏，入咗嚟天水圍搵我食早餐，一般港式嘅早餐我哋都食得唔少，今次就想試吓喺T Town商場入面搵下有無啲特色早餐食，估唔到又真係俾我哋搵到喎。
我哋喺呢間居酒屋嘅門口睇到有早餐嘅餐牌，即使係週末價錢一樣咁經濟實惠，睇過啲嘢都幾啱食，於是我哋就揀咗喺呢度食早餐啦。
[價錢 Price]
💰$32
炭烤雞扒手打烏冬 🍜
朋友一向比較鍾意食粉麵，所以湯麵餐我就俾佢揸主意。湯底揀咗魚介湯，配菜就揀咗炭烤雞扒，麵底就梗係呢度比較出名嘅手打烏冬啦！雖然係早餐，但係佢嘅份量同午餐都差唔多，亦都有昆布做配料。炭烤雞扒好香炭燒味，雞扒肉質偏淋；魚介湯底味道濃香，早餐食呢個夠晒醒神！
如果唔想揀咁日式嘅配搭，都可以選擇米線或者出前一丁呢啲比較港式嘅口味，當然你都可以選擇拉麵做麵底啦。佢有多達八款嘅食材俾你配搭唔同類別嘅麵，湯底亦都有兩款，有辣有唔辣，任君選擇，自由度非常高。
[價錢 Price]
💰$32
吉列雞扒飛碟 🥪
呢份吉列雞扒飛碟真係厚到無朋友，飛碟機壓過嘅地方非常香脆，裏面夾住生蕃茄、生菜、酸瓜沙律醬、同埋主角吉列雞扒！炸過嘅烤雞扒依然鮮嫩多汁，加埋其他口感比較清新嘅食材一齊食，一啲都唔油膩，比一般食普通嘅三文治嚟得豐富。
每個飛碟或三文治餐仲會有椰菜沙律、茄汁焗豆、粟米粒呢啲配菜伴碟，感覺就好似食緊一份all day breakfast (with a twist)！
[價錢 Price]
💰$42
炸豬扒薯條吞拿魚三文治 🐖🥪🍟
我哋仲叫多咗一份炸豬扒薯條吞拿魚三文治套餐，呢份三文治相對比較輕盈，兩件都塗滿吞拿魚沙律醬，非常啱我嘅口味。炸豬扒有兩大塊，豬扒炸得金金黃黃，調味唔會過分鹹，而且一啲都唔會鞋口，都唔錯啊。最好食嘅就係薯條，因為佢係包皮薯條，食到薯仔嘅香味之餘仲會比一般嘅薯條更加脆口同乾身。呢個餐都同時有茄汁焗豆、椰菜沙律同粟米，真係太豐盛啦，感覺呢個餐會好受小朋友歡迎。
[價錢 Price]
💰$12
手卷 🍙
$6一件嘅手卷真係抵到爛呀，雖然佢咁平咋，但係佢都好多選擇，而且食材都好新鮮㗎。我同朋友一人揀咗一款口味，我自己揀咗海鮮沙律，而佢呢就揀咗生芥末八爪魚。
我揀嘅海鮮沙律裏面有好多唔同嘅貝類，口感非常豐富；朋友揀嘅生芥末八爪魚有少少辛辣，八爪魚好彈牙，呢個價錢喺出面絕對食唔到！
[價錢 Price]
💰$16
壽司 🍣
壽司仲平， $4一件！雖然款式冇得自訂，但我哋都好好彩喎，食到三文魚、蟹籽、北寄貝同埋玻璃蝦喎！佢哋嘅手握壽司嚿飯就比較細，魚生亦都唔會切到好厚，但係勝在食材比較新鮮，所以唔會有腥味，口感亦都好好。
[價錢 Price]
💰$12
厚燒玉子 🍳
我個人幾欣賞呢度嘅凍食厚燒玉子，雖然一刻只有三件，但蛋味香濃唔會有過多嘅空氣，口感綿密，就好似食緊半熟芝士蛋糕咁。加上佢上菜前會用火槍輕輕燒過玉子表面，入口時會有蛋燒過嘅香味，咁平嘅價錢如果我個胃有多啲位，一定會叫多幾份嚟食！
[價錢 Price]
💰$8
熱飲 🍵
我同朋友各自加咗$8配一杯熱飲，佢間中薑茶，我揀咗金橘檸檬百香果蜜。朋友嘅薑茶喺而家咁凍嘅天氣下飲非常暖胃，仲有驅寒嘅作用。而我揀嘅金橘檸檬百香果物呢就有一個小茶袋裝住嘅，裏面見到有金橘、檸檬、百香果等等嘅材料，浸泡出嚟嘅飲品唔會死甜，乾燥天氣飲有潤喉嘅效果。最重要嘅係呢度嘅飲品係有得無限添飲㗎，真係非常抵呀！
總括嚟講今餐真係性價比非常高呀，$150內就可以食到我哋飽到午餐都唔洗食，而且又可以試下港式早餐以外多元化嘅選擇，下次過嚟再試吓其他唔同嘅早餐先！
張貼
