Kam's Cafe (已結業)

係太古城呢頭都"浦"咗好多年喇, 知道有呢間CAFE但一路都冇幫襯過, 今日見個SET LUNCH唔錯, 就決定試試佢。 感覺佢同PXXKA CAFE的路線好相似, 都係主打虹吸咖啡, 價錢亦相約, 最唔同的地方係環境比較舊, 不過都開咗咁多年舊都正常嘅。午餐有5個選擇, 我揀咗咖喱吉列魚柳跟白飯 , 因為我覺得咖哩同白飯係最匹配啲, 唔鍾意都可以揀跟紅飯、意粉或薯菜; 講真呢個飯唔難做, 所以基本上係冇得輸, 而呢度都交到功課, 份量亦剛好, 女仔食就啱哂!朋友就食法式牛肉汁焗豬扒飯, 樣睇落唔錯, 紅紅啲茄汁上灑上唔少的芝士 (唔記得影底 ) , 試咗一啖, 又幾好味喎, 自然啲蕃茄味帶點甜, 比食開大X樂啲好10倍! 真係要比個LIKE佢! 餐飲我同朋友都係咖啡, 一凍一熱, 凍嘅嗰杯1分鐘就到, 夠濃, 味道唔錯; 熱嗰杯就等咗好耐, 可能係即煲嘅吧, 上枱時先放下一個空的英式茶杯, 再用虹吸壺倒入咖啡, 感覺好認真, 而且都幾香, 跟餐嚟講算好唔錯。最後重有雪榚一球做甜品, 普通貨, 冇特別。 HKD80 +10% 一個午餐, 價錢都算合理, 最緊要係唔洗成日幫襯D大集團