原味家作 (已結業)

今朝又早左到公司，記得同事話原味家作都有栥飯賣於是就去睇下。望下MENU原來係紅米飯卷，餡料係榨菜肉絲，唔同栥飯因為佢係冇油炸鬼係入面既。套餐跟一杯有機豆漿，賣$20，價錢OK於是就買左番公司食。紅米飯卷SIZE大概一隻手掌咁大，早餐黎講好足夠了。雖然話係紅米飯卷但紅米比例只佔好少，第一口食落糯米同紅米口感煙韌，但再食到入面既餡就覺得咸到不得了，就算夾埋外層既飯一齊食都覺得好咸，最後要放棄挑走哂入面D配料出黎食哂D飯算。以為呢間餐廳D野會健康D，但竟然咸到我覺得食落去會有鈉超標既風險!有機豆漿店員冇問我要熱定凍，唔知係咪早餐DEFAULT左係要熱既?不過暖暖地既豆漿飲落口確係順喉唔會太甜，望下成份原來除左用有機黃豆之外仲用左冰糖同糙米，都幾特別，飲落少甜有豆味，食完咁咸既飯卷飲番杯淡味D既豆漿沖一沖D味先覺得健康番D。好彩有呢杯豆漿撘夠，如果唔係我可能真係忍唔住俾差評。不過下次早番我都寧願買個包或買個日式飯團算。真係冇下次。