金泰子泰國餐廳 (已搬遷) 新店位置

之前買過幾次外賣，都係凍食，酸辣鳳爪 & 豬肉生菜包（冇影相）。呢兩樣都令人有驚喜正喎！所以今晚揾埋媽咪一齊黎試下。5點幾入黎食個 early dinner, 坐左喺隔離個鋪位。睇過之前幾個食評，叫左五個菜。第一個到嘅係蝦炒金邊粉，個賣相…夾落去就發覺濕得滯，有啲一舊舊咁，啲蝦係底，蝦肉死實實，個粉嘅調味太淡，冇咩味。海南雞半隻繼而送到，跟泰式酸辣醬。已去骨，皮下肥膏可接受，雞肉都算嫩，不過都係太淡，完全靠個醬蝦餅係最好味果個 有成8件（已切半），熱辣辣，有蝦味夠彈牙。好期待嘅咖哩軟殼蟹同蒜蓉包差唔多同一時間送到包係意料之外咁細件，好似迷你熱狗包嘅大細，佢唔係期待中嘅脆乾身，而係外軟內微烘嘅程度。中間仲釀左少少野，不過食唔出係咩都係味淡。咖哩叫左少辣，其實完全唔辣，仲用左好多蛋黃去炒，所以個醬睇落去好“杰”。配料有好多洋蔥、唐芹&青椒。用個包仔夾住啲配菜食會好食啲，軟殼蟹有很多件數，平均每人食左4件。埋單 Hk$344, 熱食令我有啲失望。下次都係食返冷盤沙律果啲穩陣。