有囍 (已結業)

晚餐嚟到太子花園街, 本來打算叫餸食飯, 坐底後被隔離檯香噴噴嘅燒鍋深深吸引, 最後自然係跟人點咗個燒鍋套餐啦。有囍2人燒鍋套餐$438, 包括一個燒鍋 (可選 古法黑草羊腩煲 / 豬肚辣雞煲)、蒜蓉開邊蒸蝦、田園生菜 / 清炒時菜、臘味生炒糯米飯同是日甜品。份量足夠兩個男生食, 但對我地兩個女仔嚟講, 就多咗少少。豬肚辣雞煲 煲中物上檯前已經煮至半熟, 滾一滾, 湯汁沸騰, 香氣撲鼻, 令人胃口大開！雞煲配料豐富, 雞肉辛香入味, 肉質嫩滑, 豬肚份量比相像中更多, 煙韌有嚼勁, 越食越滋味。蒜蓉開邊蒸蝦、清炒時菜蝦肉新鮮, 肉質富有彈性, 朋友更驚喜發現蝦殼夠薄, 連殼食方便又補鈣。臘味生炒糯米飯糯米飯柔軟而不軟爛, 臘味均勻分佈, 很有水準。番薯糖水甜味自然, 加入薑汁十分暖胃。