星廚 (已結業)

去開金魚街買野，之後行下附近看看有咩好野食，行過門口見到佢個MENU都幾特別，就行左入去食喇。叫左個鵝肝牛柳配意大利粉套餐，一個法式田螺，甜品係NEW YORK CHEESE CAKE。先黎一個法式田螺，聞落去相當之香，田螺相當爽肉，咬口一流，我幾鍾意佢個田螺底下既薯蓉，因為佢似乎吸收左一啲田螺既鮮味，再配搭埋其他調味料，好香口。再黎主菜鵝肝牛柳配意大利粉，真係一萬個讚，抵食夾大件，質素仲相當唔錯。鵝肝面頭係舖左滿滿既黑松露，令到個鵝肝本身已經好香好香，佢煎到有少少燶但又唔係好燶，一啖食落口，鵝肝既鮮味係即刻會係口入面散發，入口即溶果隻。如果再大舊啲就好喇。不能不提個牛柳，我叫左三成熟，同行友人話我係生蕃，我認，因為我鍾意食好鮮口既野，但通常去其他餐廳叫三成熟總會黎七成甚至以上。呢度個牛柳，係真三成熟。牛柳肉質係相當鮮嫩，而且相當厚切，而且仲竟然係有兩大件，滿足哂我呢個大胃皇。NEW YORK CHEESE CAKE亦係好得，因為佢芝士味係真係相當濃郁，而且餅底鬆化，藍莓好好味道。埋單發展價錢相當親民，讚。