好媽媽台灣館 (已結業)

夜晚又要去太子附近上堂， 所以要周圍搵嘢食。 太子街頭都會有多小食店，質素唔差， 所以都係周圍行下，openrice一下，而且見到門口貼住咁多金剛小儀嘅大頭，就入咗嚟呢度試下。醉豬手 ($28)一入口有酸酸醉醉嘅味道，肉質都唔錯，唔會太膩。我個人一向都鍾意食醉豬手，呢度個質素同味道好好！雙拼滷肉飯套餐 ($52)我就揀咗鹵水雞翼加鹵水豆腐。雞翼唔太入味，肉質偏乾，而豆腐亦稍為乾身。滷肉感覺油膩，未食完一半已經感到飽滯……蚵仔大腸麵線 ($40)望落賣相唔錯，不過同我喺台灣食過嘅麵線相比，湯同麵嘅比例有差距，而且偏鹹，令人有啲失望。