香港地 (已結業)

陪外國朋友上山頂觀光，佢哋話想食吓啲傳統香港美食，於是就搵咗間有呢啲食物嘅茶餐廳試吓。茶餐廳面積不大，但食客很多，攞咗號碼之後都要輪候十五分鐘左右，我估可能觀光客都喜歡食吓香港嘅傳統美食， 所以咁多人等位喇！呢度啲服務非常差，叫人落單都等咗好耐，個個侍應行過都當睇你唔到， 攞杯水都要問幾次！爆棚焗豬扒飯餐牌張圖好靚，又話係佢哋嘅招牌菜。 點知個猪扒飯到咗，同張圖完全唔同， 又一次圖片只供參考嘅例證。唔緊要喇，樣唔靚但好食都ok！點知味道只是非常一般，連連鎖快餐店嘅豬扒飯都好食過呢度。十三么星洲炒米唔知點解叫做十三么？我嘅理解係材料樣樣都有啲咁解，點知碟星洲炒米嚟到，完全唔係我嘅想像。蝦仔得三隻， 少少蛋絲、少少韭黃， 一啲咖哩味都冇，完全唔係星洲炒米嗰回事。夠鑊氣乾炒牛河呢碟比較正常，雖然唔係食肆標榜嘅夠鑊氣， 只係有鑊氣，但都ok嘅 。不過牛肉就少啲，但味道都算唔錯。懷舊西多士個樣幾靚，炸到金黃色，可惜切開裏面蛋漿浸唔透，正一係好睇唔好食。呢間食肆，食物水準非常一般，價錢唔平，服務水準差，下次嚟山頂一定唔會揀佢。