燚館特色粉麵 (已結業)

今日特登去食一間叫燚館嘅藥膳米線，「燚」字究竟點讀呢？！我特登上網查過，「燚」可以讀「亦」亦都可以讀「藝」，不過唔知啱唔啱呢？！🤔🤔好啦～都係講返食物先，我今日特登嚟到係試佢哋主打嘅藥膳米線，而我朋友就叫咗胡椒豬肚米線。呢間餐廳價錢平民化，其實喺得大埔舊墟做食肆，都以街坊生意為主，呢個價錢亦都好街坊價！係抵食嘅～好啦～嘢食到，我先試一下藥膳雞髀米線啖湯底（加$10可以轉雞髀），因為藥膳米線個湯係靈魂，一飲落去...好淡口，我從未試過食藥膳米線個湯會係咁淡，好似溝咗水；即刻試埋朋友叫嘅椒豬肚米線個湯底，一樣係好似溝咗水咁而個米線亦都好淋，好似煮耐咗咁！我唔知道佢哋係點樣煮個米線。究竟係放喺湯入邊煮？定係清水煮完再放落湯底？！如果係後者，佢哋極有可能未隔清煮米線嘅水，就直接放落湯底，所以湯底就溝咗多餘嘅水份變得淡口。但最終原因，係得佢哋先知😓評價：差！！湯底同米線差，基本上唔使再講個餸好唔好食，可以埋單走人～