奇華餅家 (青衣城1)

營業中

休息中

舅仔知小弟乜都鍾意試，雖然過咗中秋，都晌女友嗰邊照拎嚟一個奇華出品嘅「珠姐XO醬金華火腿月」醒俾我，讓我有機會試到依款咁奇突，試完「嘩嘩聲」心諗咁都得嘅產品。其實，邊個喺「珠姐」呢？啊，從官網得知，原來喺奇華餅家創辦人黃業榮先生嘅長女黃碧珠，而且仲一早以佢為名，出咗隻「珠姐XO醬」，以瑤柱、金華火腿、優質蝦米、蝦米子等上乘食材嘅精心傑作，集鮮、香、濃多層次，富口感嘅味道。真喺算小弟見識少，都唔知個XO醬咁大有來頭。XO醬咁有名氣，而佢啲月餅亦唔差，今年獻新猷將兩者嚟個交叉創作，推出依款創新獨特嘅「珠姐XO醬金華火腿月」。大大個月餅，印上「XO金腿」，睇番個成份，主要材料有XO醬、金華火腿、蝦米、瑤柱、黑瓜子、合桃、杏仁、欖仁、白芝麻、糖冬瓜，仲加有玫瑰露酒、辣椒粉……等等，實在架勢呀。查實小弟對五仁月、金華火腿月依類鹹月餅印象普通，唔可以講佢唔好食，只喺唔太啱食嚟啫，不過點都會試試嘅。奇華依個XO醬金華火腿月，將佢一開四，清楚見到滿佈各種堅果，咬落甚有口感，真喺食到牙軟，但XO醬味就真喺挺突出，而且又食到一絲絲金華火腿，味道帶點辣，又帶點鹹，總結都喺嗰句，唔太啱口味囉！