金御海鮮酒家 (恆豐中心)

營業中

休息中

個多星期前去咗呢度同朋友食晚飯，三個人叫咗一個龍躉套餐，好抵食，條魚唔太大，調味有水準，太大嘅魚我唔鍾意，因為多數肉質都比較「鞋」，但係呢度嘅蒸魚套餐，size啱啱好，條魚唔會太細冇肉食，又唔會太大太老，蒸得啱啱熟，時間掌握得好，然後仲可以加配小菜，我哋揀咗鮑魚雞煲，鮑魚有四隻，我哋三個人夠分，仲可以有人食多隻，然後啲雞份量都OK，唔算太少，再加一個菜同埋白飯，整體份量係合理嘅，味道亦都保持到金御以往嘅水準，當然酒樓菜會有啲油膩，但係唔算太過分，材料亦都合理，價格唔算貴，係一個好啱普通食飯場合嘅價位，當然如果要慶祝一啲特別日子，呢度嘅水準就未必好夠好，環境亦係普通一般市區酒樓酒樓咁上下，但係招呼好好，喺樓下問我幾多位，話有另外兩位到咗，已經識得帶我去朋友嗰張枱，好醒目，然後我朋友漏低咗啲嘢喺酒樓，返轉頭都好容易搵返，因為幫我哋keep好咗。呢度值得再嚟，價錢合理，招呼好，食物水準都ok，值得推介。