大丸和風食堂 (已結業)

已經好耐冇去過女人街啦，今次就陪阿媽行街雖然人流少咗行路暢通咗，但係啲食肆都多咗好多，可惜好多都細細間咁，望似坐落都唔多舒服。但喺呢間睇落去相對大間，又有卡位，而且枱同枱之間又唔會太迫，價錢都合理，就決定呢。由於整個Menu啲嘢食都幾抵食，忍唔住嗌咗好多嘢。個人最推介火焰三色卷，牛油果軟殼蟹卷，個師傅包得幾好，唔會散修修，而且可以一啖個擺落口。至於火焰丼飯，分量感好充足，可惜太多沙律醬。仲單叫咗蟹子軍艦，鰻魚壽司等等，大概都係$1x-2x一碟，價錢同爭鮮差唔多，但係個飯係有溫度㗎，好食好多。最後叫咗和風炸雞，係相對大塊，但係好似炸得比較耐，導致個皮比較硬身少少，而且個皮本身有啲味道，再加上上面嘅沙律醬，同埋日式嘅醬汁，個人來講偏鹹咗少少。