高堡

營業中

休息中

高堡係女人街入面一間新開漢堡小店，哩日同朋友行完山出返旺角食lunch，見佢新開張午餐送飲品幾抵食就入去試下。佢地個lunch set大約$6x至7x，新張期間送野飲仲免加一，所以都見有唔少食客一支公黎幫趁。荔枝梳打 & 水蜜桃梳打(跟餐免費) - 本身特飲跟餐要加$8，而家新張期間免費，梳打幾大杯，飲之前攪勻佢，甜度適中，梳打味唔會太重。什錦炸物($58) - 炸物拼盤有炸蝦、炸蠔、炸蟹鉗同炸南瓜薯餅，炸皮香脆得黎唔會太厚太硬，炸蠔唔會太熟仲好juicy。吉列芝士豬扒配豬骨濃湯烏冬($65) - 豬扒加左芝士再炸，半琺芝士令豬扒食落冇咁乾，吉列炸皮唔會太油，鳥冬量都幾多，幾彈口。牛肉漢堡配薯條($65) - 漢堡包烘得幾靚仔，漢堡肉唔會太鞋，番茄清新生菜爽脆，薯條香脆唔會太鹹，整體唔錯。檸檬芝士餅($48) - 芝士餅唔會太乾，口感較為硬身，食倒檸檬清香味，如果酸多少少更好。總結，小店裝修雖然比較簡單，不過地方都乾淨企理，坐位唔會太迫，食物賣相同味道都唔差，免加一同午餐送特飲幾抵食。