LA Restaurant & Dessert Bar (已結業)

通菜街一向都多野食，是日約左朋友去旺角行街，佢介紹黎呢間西餐。餐牌上面有好多選擇，可以揀套餐或者a la carte。餐湯配餐包：是日餐湯係南瓜湯，入口好creamy，無粉粒，味道亦都非常濃郁。餐包方面係法包，上面塗咗蒜蓉醬，新鮮烤起，非常香脆，旁邊仲配咗自家製嘅蕃茄醬，入面仲有好多蕃茄粒，食落好有口感，非常特別。烤焗芝士蟹肉牛油果:牛油果熟嘅程度剛剛好，入口極之Creamy，上面放左少少蟹肉，再鋪咗少少芝士去烤，味道十足，帶輕輕嘅芝士味，配埋底部嘅新鮮沙律菜，整體配搭非常清新。德國鹹豬手配酸椰菜:上菜時真係令我地「哇」一聲，隻豬手真係好大隻呀！入口熱辣辣，外皮燒得超香脆，肉嫩而香滑得黎又唔太油膩，顏色呈嫩紅，食落好夠鹹香味，唔洗點醬汁已經好好食，伴碟仲有沙律菜，酸菜同埋蔬菜， 入口非常清新，令整體油膩感減低。LA 伯爵茶奶凍焦糖脆脆伴雪糕:個奶凍有好香濃嘅伯爵茶味，配上香甜嘅雲呢拿雪糕，加埋香脆嘅焦糖脆片，勁有口感，亦都令到層次非常豐富。飲品我地要左熱利賓納同埋咖啡，咖啡味勁香濃，為我地嘅晚餐劃上完美句號。