蛇王兄 (已搬遷) 新店位置

蛇油雞飯一碗，搞錯呀 ﹗食左十次都係雞翼，1 次雞髀都從未試過呀 ﹗嘩 ﹗雞髀出現喇，我第一次見乍 ﹗對面兩條女居然都有雞髀食？﹗斬雞位大粒墨肥叔叔，您係咪咁偏心呀？﹗我話晒都個個月幫襯幾次架喎 ﹗下次我 order 半隻蛇油雞飯，睇您仲比唔比雞髀我食 ﹗今次又係雞翼，算數，食左先講。雞翼斜斬真係唔多好呢，雖然睇落靚好多，但真係危險架，咁尖 ﹗食既時候要特別小心，唔好插親喉嚨同個咀呀，雞中翼唔洗斬啦。雞翼皮香肉嫩，都好滑，加上濃郁香甜既蛇油，梗係好食啦 ﹗白飯索盡蛇油，咸香突出，好正 ﹗蛇湯細，高質香甜味美熱辣辣，邊有得輸呀 ﹗今晚超高水平，大讚 ﹗飯羮湯都非常美味，最鬼衰雞翼囉 ﹗蛇羮細，今晚居然全院滿座喎，天氣凍係唔同啲，食物去得快，出品新鮮啲又好味啲 ﹗蛇羮極鮮甜，完全唔需要加任何調味料，胡椒粉、浙醋、檸檬葉通通都唔洗用 ﹗可遇不可求啦。質感厚薄適中，足料啖啖蛇肉，好好味呀 ﹗最初諗住食碗雞飯連蛇湯 HKD55 蚊夠喇，食食下又似乎唔多夠飽，唯有轉 96 蚊個雞飯蛇湯蛇羮餐啦 ﹗老闆當我散叫企圖收多我 6 蚊，我都唔係傻架，間中都識計數架。