蛇王兄 (已搬遷) 新店位置

依家搬左新場，新祥街 8 號地下。老闆班寵物移晒出門口做生招牌，佢地好可愛又好肥美呀 ﹗快啲比我食啦，哈哈 ﹗搬左新舖大左乾淨左空氣又好左，價錢都加左，飯羹湯套餐 HKD100，可接受，最緊要好味道。最初坐低只 order 左細蛇羮同細蛇湯乍，但見到其他食客食蛇油雞食到津津有味，香氣不斷地侵襲我 ﹗忍無可忍呀，老闆唔該幫我轉食套餐雞飯啦 ﹗可惡 ﹗咁就有羮有湯有飯，大滿足。蛇湯，香濃味美又清甜，甘香藥材味道直擊味蕾同嗅覺，熱燙燙送入口中，回味無窮，好正。見到有果皮、圓肉、杞子、等等，太好味啊 ﹗一滴都無剩，可否添飲呢？蛇羹，厚薄適中，無話杰撻撻一舊舊，蛇肉非常肥美，彈牙啖啖肉，用足料無搵笨，好多配料，味道甜美豐富，超足料，蛇肉、冬菇、木耳、等等。無投訴，太好味喇麻！超水準表現，食客越多就越好味，貨去得快，出品特別新鮮好味又熱辣辣。食左兩啖原味，好好食呀！非常香甜。不過我鍾意醋既味道，浙醋配胡椒粉就更加開胃醒神，如果有左顯記辣椒油我就更開心啦。蛇油雞飯，嘩！食左兩年第一次有雞髀食呀！開心死！係咪肥佬叔叔見到我係 open rice 投訴佢只有女仕有雞髀食呢？哈哈，真係唔好意思。但我仲未

本來今晚係到灣仔六十四樓食 360 度海境西班牙菜架 ﹗但朋友爽約，唯有返上水食自己 ﹗獨自蛇一蛇啦 ﹗五蛇湯，經常都唔同味既？真搞笑，材料份量咁隨意？而且一時杰又一時水呢，不過都好味道，最緊要趁熱飲，凍左就麻麻地喇。細蛇羮，先試幾啖原味先 ﹗有木耳、冬菇、蛋花、等等，蛇肉當然唔少得啦。可能剛剛入秋，蛇肉未夠肥美，不過都好好肉地。再加醋、胡椒粉、檸檬葉絲，味道豐富，材料夠份量，正 ﹗蛇油雞飯一碗，展兄食過都話一定要 encore 既蛇油雞飯呀 ﹗雞味雖然略淡，不過勝在蛇油香濃，咸香又帶甜，加上神秘既引力，夾得剛好 ﹗肉質嫩滑，肥瘦得宜。但點解食左咁多次都無雞髀既？剩係得雞翼、雞背同雞胸，無理由次次都無髀食架喎，唔通隻隻雞都係跛既？蔥油調得非常香口，白飯加蛇油再撈埋蔥油，真係可以食到幾碗飯呀 ﹗無懈可擊呀 ﹗

剛才係旺角榮園食左碗垃圾牛筋腩麵後，同強國人戰鬥左粒幾兩粒鐘，野又買唔到，兩手空空 ﹗嬲嬲地返上水食多碗蛇羮順順條氣，再返屋企休息，算鬼數 ﹗蛇羮細，天氣一轉冷，蛇王兄即時客似雲來 ﹗好 full 啊，好采仲有一個位啫。蛇羮去得快都持別好味架喎 ﹗熱辣辣出晒煙，又唔會話放得耐變同杰撻撻，依家厚厚剛剛好，fit 晒。味道香濃帶甜，夾雜住藥材既清香，加上蛇肉同大量配料，超水準表現 ﹗蛇湯細，真係無咩幾何飲蛇湯會有咁多湯渣，飲左幾十年蛇湯都係淨湯架喎，有渣都係第一次 ﹗新黎依位瘦呀姐一定係好鍾意食湯渣定喇。味道清甜可口，堅好味 ﹗今日好病，喉嚨痛又好似有少少感冒，專登飲多碗大龜湯。藥材味道平均，厚薄得宜，好味道 ﹗佢地話清熱解毒麻，試試無妨，好過走去排診所，飲完再去買外賣今晚做宵夜。

聽晚係今季鏢賽最後一場，今晚諗住食完飯就返屋企休息。諗左好耐，決定去食蛇油雞飯，賽前食蛇補補去。一坐底即刻叫個蛇油雞套餐先，有龜湯送埋只係五十幾炆，但居然雞已沽清 ﹗搞錯呀 ﹗黎左 3 次都食唔到 ﹗上兩次無開門，今次就賣鬼晒 ﹗黑仔呀 ﹗坐低左又費事去第度食啦，侷住食勁肥膩既糯米飯 ﹗唉。細蛇羮餐連蛇湯同糯米飯，八十幾蚊好貴啊 ﹗蛇湯，我其實一心想飲龜湯架，睇錯左，原來龜湯係併雞飯，頂 ﹗今次第二次飲蛇王兄既蛇湯，上次真係麻麻地，川貝味太濃，味道太濁。不過今次好味好多喎，味度 balance 好多，仲有龍眼肉既清甜，而藥材味又剛剛好，味道次次唔同咁搞笑架。細蛇羮，點解今日既蛇羮同蛇湯都比上次好食咁多架？湯底濃郁香甜，足料又厚薄適中，上兩次都勁杰撻撻囉。加埋醋同胡椒粉，好開胃呢。雙腸糯米飯，無臘味、無蝦米，只有勁多肥豬肉同豉油撈既糯米飯。只靠肥豬肉既豬油香味非常單調，食落叫做夠味囉。潤腸同臘腸都超級肥，成口都係油，潤脣膏都慳返 ﹗今日又無雞飯食，侷住食依個超標糯米飯囉 ﹗

蛇油雞飯一碗，搞錯呀 ﹗食左十次都係雞翼，1 次雞髀都從未試過呀 ﹗嘩 ﹗雞髀出現喇，我第一次見乍 ﹗對面兩條女居然都有雞髀食？﹗斬雞位大粒墨肥叔叔，您係咪咁偏心呀？﹗我話晒都個個月幫襯幾次架喎 ﹗下次我 order 半隻蛇油雞飯，睇您仲比唔比雞髀我食 ﹗今次又係雞翼，算數，食左先講。雞翼斜斬真係唔多好呢，雖然睇落靚好多，但真係危險架，咁尖 ﹗食既時候要特別小心，唔好插親喉嚨同個咀呀，雞中翼唔洗斬啦。雞翼皮香肉嫩，都好滑，加上濃郁香甜既蛇油，梗係好食啦 ﹗白飯索盡蛇油，咸香突出，好正 ﹗蛇湯細，高質香甜味美熱辣辣，邊有得輸呀 ﹗今晚超高水平，大讚 ﹗飯羮湯都非常美味，最鬼衰雞翼囉 ﹗蛇羮細，今晚居然全院滿座喎，天氣凍係唔同啲，食物去得快，出品新鮮啲又好味啲 ﹗蛇羮極鮮甜，完全唔需要加任何調味料，胡椒粉、浙醋、檸檬葉通通都唔洗用 ﹗可遇不可求啦。質感厚薄適中，足料啖啖蛇肉，好好味呀 ﹗最初諗住食碗雞飯連蛇湯 HKD55 蚊夠喇，食食下又似乎唔多夠飽，唯有轉 96 蚊個雞飯蛇湯蛇羮餐啦 ﹗老闆當我散叫企圖收多我 6 蚊，我都唔係傻架，間中都識計數架。

每到天氣凍既時候，總係想食碗蛇羹暖下身，起上水就一定會嚟依度到食蛇，嚟到先發展原來搬左去隔離街，新舖比舊舖面積更大更好坐，不過望一望個餐牌發現價錢又貴左，真係百物騰貴。坐底叫左個雞飯餐同細蛇羹，咁就要百幾蚊，真係唔平。蛇羹一上到枱就知道對辦，好足料真係啖啖蛇絲，雞絲同木耳絲，加埋檸檬葉和薄脆，食完非常暖身，很好吃。雞飯套餐包個龜苓湯，湯入口熱辣辣，味道濃郁，有少許藥材味幾香幾好飲。到碗蛇汁雞飯送上枱時，一陣香味撲鼻，入口雞肉夠滑配合埋蛇汁既惹味，加上自家制既薑蓉，真係一陣就食晒碗飯。

龜苓湯，第一次飲，點解咁好飲既？又香又濃又清甜喎，比佢地既五蛇湯更美味 ﹗蛇油雞飯，一見到比雞翼就好唔開心喇 ﹗唔比雞髀都比雞胸我啦，骨杉杉討厭 ﹗上一次食蛇油雞飯係幾年前大埔蛇王如，佢地個汁濃但較水。依度既蛇油汁又厚又濃，一放上枱已聞到香氣 ﹗晶螢通透，熱辣辣撈飯食，太好味喇 ﹗雖然白飯質量仍有好大進步空間。依種既香甜唔知點去形容，總之令到我有想叫多碗雞飯既衝動。蛇油既神秘咸香越食越想食，再撈埋自家薑蔥油，不得了 ﹗雞應該只係普通既白切雞，雖則只係雞翼，肉質都好嫩滑，打入靈魂蛇油，非常美味 ﹗師傅斬雞翼不太好，斜斬骨頭好尖好危險啊 ﹗依個飯比起佢地既蛇羮或糯米飯好食數十倍啦 ﹗大力推 ﹗蛇油雞飯一碗配龜苓湯套餐，多謝 HKD55 ﹗轉一碟都只係多 HKD5 蚊，但怕食得太飽呢 ﹗我要留肚再食其他野麻。

由今朝出門口黑到依家，本諗住衝返上水試隱世日本人美味拉麵，但居然無開門，咁唯有黎試蛇羮啦，首次幫襯 ﹗價錢比起我係大埔食開既貴一點，普通蛇羮套餐要 HKD86，大埔蛇王海約 HKD50 乍喎。蛇舖黎講，依間比我感覺好乾淨、企理又開揚，而且空氣流通。店內仲有幾條好活潑生猛既飯剷頭寵物點綴一下，好得意呀 ﹗臘味糯米飯，聞落真係非常香啊 ﹗熱騰騰噴晒煙，質感濕潤，糯米飯粒入口嚥嚥韌韌而較為腍身，易胃痛既朋友就要小心喇。發現糯米飯只係用大量既肥豬肉粒撈埋一齊，所以咁鬼香口囉 ﹗加埋生蔥同豉油，真係好好食。不過糯米飯中沒有臘肉、沒有臘腸、沒有蝦米，咁樣少左陣肉香囉，單調豉油撈飯，臘腸膶腸係同飯分開架 ﹗好想食返正宗既生炒臘味糯米飯呢，要有臘腸、臘肉、蝦米一齊炒先好食架麻 ﹗蛇湯，顏色偏深，見唔到底喎，我一向飲開都較清。味道都唔錯，川貝味較濃，所以顏色程深啡色，一定要趁熱飲，凍左味道變差左。蛇羮，一食落口，超濃既冬菇味，眼見八成都係菇，除左菇味跟雞湯味就無其他味道喇，好單調。都係加醋、胡椒粉救救命先。套餐 A 要 HKD86，有湯羮飯，以依個份量同質數唔值呢，下次試埋個蛇油雞就可以 bye bye

黎左三次，今日終於食到蛇油雞飯喇 ﹗痴線架咩，真係三顧草蘆囉 ﹗星期六返半日，收工順便買酒，食個 lunch 後就返屋企休息預備今晚去西貢墨魚船河。店內依然有養蛇做寵物，都幾得意既，等野食唔怕悶親啦。龜苓湯，近來硬係好熱氣又喉嚨痛，希望飲完會舒服啲啦，話明袪濕解毒。依世仔第二次係龜苓湯都係蛇王兄，上次好味啲喎 ﹗因咩解救今次勁杰架，住有點澀澀地，味道還可以啦。蛇油雞飯一碗，又無雞髀既？上次比雞翼，今次比雞胸 ﹗您個大粒墨肥佬收埋晒啲雞髀自己嘆呀？過份 ﹗雞胸咬落肉質都嫩滑軟軟無渣，仲有肉汁喎。雖然雞肉本身雞味唔濃，但配上濃郁蛇油非常開胃又香口呢 ﹗味道甜甜地、帶點肉既香味、又有少少咸香，撈飯好正啊 ﹗加埋自家蔥油，更加香口，食到停唔到口 ﹗蛇油又對身體有益添。蛇油雞飯餐連蛇湯五十幾蚊，還可以啦，合理價錢。

龜苓湯，老闆話可以排毒袪濕喎，最鍾意陣藥材味，熱辣辣好好飲呢 ﹗質感仲膠膠地添，凍左真係難飲好多，一定要趁熱。蛇羮，味道都唔錯。實在無辦法，夏天始終唔係食蛇既季節，蛇肉又少又瘦呢 ﹗好采仲有大量木耳、冬菇、瘦肉啫，都幾好味。正所謂秋風起三蛇肥麻，依家夏天無肉食呀 ﹗蛇油雞飯，好食到不得了 ﹗蛇油非常滑溜，質感厚薄適中，咸香又帶甜，味道特別 ﹗香味濃郁，撈飯食一絕呀，真係可以撈上兩三碗飯都唔覺膩 ﹗切雞皮香肉嫩，半肥瘦剛剛好。早前係大埔蛇王如食過一次，都好味既，不過佢地個汁較稀較水囉，似鹽水雞多啲。蛇油雞飯、龜湯、蛇湯、蛇羮、糯米飯，夏天都要進補架 ﹗好味道 ﹗多謝展師傅同成師傅過黎我屋企維修廚櫃同冷氣，小小心意我請客啦 ﹗三個麻甩的浪漫，最衰無得一齊啤啤去，師傅們由朝做到晚太睏，想盡快返屋企休息，連打冷都唔想，所以走左黎食蛇快餐囉。

搬左新舖第一次幫襯，新舖感覺新淨、乾淨，地方大啲、冷氣勁啲、裝修企理啲。都推出左唔少新菜色喎，相當吸引 ﹗仲有蛇宴提供，我好有興趣，但要集齊 1 圍呢。細蛇羮，暖暖地乍？要熱辣辣先好食架喎。質地好杰好漿，冬菇、木耳、蛇肉作配料，硬係少左啲野咁，味道好平淡，感覺比以前差左。細龜湯，點解味道同我阿媽煲既粉葛湯一模一樣架？質地好杰，同粉葛湯一樣，怪怪的。閒日晏晝依個時侯得小貓三四隻，點知有兩個大陸婆帶住兩個細路走入黎幫襯，起初問各項價錢，我心諗 menu 同牆度咪寫晒係度囉，唔識字架？之後連問幾次湯同羮有咩分別？咩係蛇羮？咩係蛇湯？您地返祖國啦 ﹗鬼殺咁嘈，自己屋企呀？最後叫左兩個 A 餐再加多個糯米飯，似乎您地老公都搵到吓錢喎，恭喜恭喜 ﹗

秋風起,梗係食蛇羹啦.既補身又美味.今次就在上水找到蛇王兄.新店已經搬了去新祥街喔.環境尚算新乾企理.不過次次去食蛇羹,心入面總有個疑問,到底那些活生生的蛇係唔係真係會在店內?不過講到底如果無蛇咬我都算啦,唔理得咁多.通常蛇店都有套餐,呢度都唔例外.今日心水是A餐$96,包一碗細蛇羹,一碗蛇湯和一碗蛇汁雞飯(可轉臘味飯)除了套餐,亦都有少量蛇既料理先送上蛇羹.雖然叫細碗,但份量絕不少,我實在想像唔到大碗有幾多.蛇肉超級多,而且木耳和冬菇既份量亦不少,每一口都是材料,味道濃厚,蛇肉像豬瘦肉的感覺,但不乾口,由於在冬菇和陳皮等等材料影響下,變得十分鮮.如果愛食碗仔翅既朋友,我諗絕對會愛上蛇羹.當然唔少得加點脆脆放係面,更加多口感層次蛇汁雞飯亦都是美味,又係O個句,蛇汁既味道都係一個謎.好難解釋.但呢度既出品有點似無咁咸既鮑汁.撈飯當然過癮.難得既係雞肉既雞味不淡,而且好有彈性.蔥蓉唔會係呢碗中有任何作用了.蛇湯既材料有著不同既藥材,類似沙參和元肉等等,有肉香之餘又不失藥味,而且甘而不苦.總之就好多料.96蚊雖然不便宜,但蛇羹真係好足料!估不到係上水終於找到美食了

去完圖書館後，還沒到吃晚飯時間，而我亦肚餓！阿媽今日突然話想食蛇羹，所以便到此店吃蛇羹。好好味呀，材料好多，果ｄ薄脆放係蛇羹裡好好味！服務態度不錯，很好呀，有機會吃它的雞飯。

好耐冇去呢間蛇店細細個食過一次，果陣時多人到排隊入到去都係一如以往，環境冇變叫左個A餐有蛇羹, 蛇湯, 糯米飯料足, 多蛇肉蛇湯就好夠味糯米飯就一般, 過得去埋單78

2月26日，20:15明晚大魔怪要起程了，便請了一天半假，南下前先到上水買"謝太公"枇杷膏。上次試過碳燒五層樓後，回程發現這家蛇店，無奈當晚胃納已無空間，今晚終可如願。廢話講完，回到蛇餐：花膠五蛇羹：羹底不算杰，蛇肉大片不覺鮮，冬菇、木耳份量足，花膠不多見蹤影。蛇湯：入口甘美、藥材和圓肉味濃，飲完後餘甘持久不散。雙腸糯米飯：雖不是生炒，但口感仍好，不會有吃粢飯的感覺，吃完碗底有一層厚厚的油，臘腸一般貨色，花生夠香脆。這店還供應各種茶記食品，這樣盛夏便不用休業了，老闆腦筋夠靈活。店選址適中，我等深圳上班族，祇花約半小時交通時間，便可吃到安心又放心的蛇餐。