明園粉麵茶餐廳 (已結業)

收工前收到兩張優先場，拿拿臨搵少少野醫肚然後趕去睇crash，望望門面，一套「架撐」煲粥，又有麵檔，就試試睇下咩料。一貫茶餐廳格局，水吧放滿一罐罐黑白牛奶，牆上貼滿著雜誌介紹這裡的樽裝奶茶，是無加冰就咁雪凍而成奶茶，即是灣仔金鳳的friend。要了自製鯪魚河，掛住諗野，由佢慢慢整，結果等左十分鐘先上，真係有無搞錯，魚肉一早整定，河滾一滾就可以上，唔明個師傅搞乜，唔憂做咁，又係茶記一貫風格，就係師傅同伙計個個都有性格。鯪魚大大件，不修篇幅，該是自製的，打到起膠，幾有咬口，不過就好腥，勉強食o徙，白色微杰的湯底，唔似魚湯，飲唔出是什麼名堂，味精總有少少，唔算嚴重，個河粉幾滑，配淡口既湯都唔差，就湯河而言，交到貨仔。餐加$7配凍奶茶，茶膽做得唔錯，夠濃郁，可惜奶還奶味，茶還茶味，好似水溝油咁，怪哉。呢排寫的食評都是麵，莫講話睇個位朋友，連寫個位都寫到悶，最衰就係食唔厭個下慚，是時候換個口味．．．．．．