元祖和風食堂虎藏 (已結業)

呢日一行二人嚟到啟田道嘅元祖虎藏和風食堂食晏。我哋叫咗兩個定食套餐，豬肉泡菜飯拉麵定食 ($54)、虎藏牛肉飯拉麵定食 ($54) 及凍檸茶($7)。兩個定食套餐嘅前菜、拉麵係一樣嘅，唯一唔同係飯上面可配搭嘅餸。先講講拉麵，有三款湯底可以揀，和風醬油、豬骨及味噌。我哋今次都揀咗豬骨湯底，湯底飲落似加咗少少味精提鮮，拉麵入面嘅叉燒都算腍身，但食落味道唔係好新鮮，全碗麵較好食嘅係個竹筍，不過有渣。再嚟講講兩個飯，先講飯底，飯粒望落似日本珍珠米，但好奇怪食落鬆鬆散散，完全無綿膩嘅感覺，而且一啲米香都無，失望。牛肉煮得太老嚡口。泡菜豬肉，豬肉少到幾乎揾唔到，而且啲泡菜非常腍，腍pat pat, 口感好奇怪。杯凍檸茶, 跟餐加$7，真心覺得有啲貴，而且茶味同檸檬味都太淡，亦都比較細杯。最後講講服務，可能因為新開張嘅關係，服務有點混亂，我哋張枱同隔離張枱，都有上錯餐嘅情況出現。雖然呢度D套餐定價唔貴，不過好有將貨就價嘅感覺，無論食材、服務都有大大改善嘅空間。