沛公甜品 (已結業)

喺耀華街食完晚飯就過隔離食甜品，有間星級嘅甜品門口排哂長龍，真係唔知要等幾耐。退而求其次就揀間無人排隊立即入座嘅沛公。舖面嘅裝修都幾簡陋，甫坐低已經覺得間舖好噪，因為旁邊幾枱都係一大班操普通話嘅年輕人，似乎呢度好受內地人歡迎。香芋紅豆千層班戟$28，個賣相麻麻地，啲cream跌哂出嚟。個班戟有大量嘅cream，少量紅豆同芋頭肉，香芋味唔係好突出，味道一般。椰汁芒果黑糯米，味道正常，黑糯米同芒果嘅份量都算多，芒果幾甜。三甲$68，包括有楊枝金露、西瓜馬露天使、蜜瓜紫霞仙子。改個咁fancy嘅名，估唔到出嚟係咁普通，賣相唔吸引，食落冇特別，每碗都裝到滴哂喺個碗邊嚟上枱⋯呢個價錢真係接受唔到咁嘅質素。最沉實嘅蕃薯糖水竟然味道最好，睇色水就知足料煲咗好耐，呷一口味道夠薑，唔太甜，仲有大量蕃薯，但因為蕃薯好滯，太飽食唔落，早知叫佢俾多糖水少蕃薯我啦自從當年風靡一時嘅千層班戟之後，似乎已經後勁不繼，再冇推出其他吸引嘅新產品，俾好多新崛起嘅甜品店迎頭趕上，希望遲啲沛公會有改善啦。