一品雞煲火鍋

營業中

休息中

上星期買左本雜誌，入面介紹左三十幾間必食得奬既食店，為食既我當然要去試下，今日就搵左兩位朋友去呢間一品雞煲。我知上得雜誌都唔會小人食架啦，都約早班為食友七點去到。嘩，點知一去到門口已經有成十幾人係度等緊，我心諗實有排等，所以嗱嗱淋入去攞飛先。入到去問收銀處小姐三位要等幾耐，佢話都都要等六七張，不過問我搭唔搭枱，搭就唔洗等。我聽到好驚訝話打邊爐都搭枱？？收銀處小姐有禮貌咁同我講張枱其實好大，叫我睇下先，我見出面咁情況當然話可以啦，於是唔洗等就有位坐！！正！我地先叫左個小辣雞煲，上左之後再煲多陣，會有職員過黎搞個煲，個煲一開時勁香！！入面仲有好大既紫洋蔥，辣辣地又帶點麻，個汁好食到不得了，雞亦滑既，真係唔怪得大排長龍。我地仲叫左d配料食，手切肥牛幾好，牛丸就麻麻，蔬菜都新鮮，最值得推介係手打滑同烏冬！手打滑又彈牙又滑，仲可以係四款選兩種做雙拼。而個烏冬真係不得了，並唔係普通出面食到，吸埋個煲d汁，一流！我地叫左四碟先停手！呢餐非常滿意，得獎既食店果然係唔同，我實會叫多d人再黎。最後真係要多謝收銀處小姐，唔係佢我話知可以搭枱我諗我有排等。