Bingo & Cook (駱克駅) (已搬遷) 新店位置

銅鑼灣裏的小韓國，餐廳位於銅鑼灣樓上鋪，一上到去，竟然好似置身喺首爾嘅韓國食堂一樣，侍應係韓國年青人，連裝修都有一番韓國嘅風味。有俾適合一班朋友坐嘅開放空間，亦都有一個個好似圖書館自修室嘅二人座位，放上店主滿滿喺旅行收藏既戰利品，等你喺等嘢食嘅途中眼睛都可以目不暇給。嚟到韓國餐廳點可以唔叫炸雞同年糕，呢個甜辣醬無骨炸雞炸粉唔多，甜辣醬配上香脆嘅雞皮，相映成趣，咬落去雞肉嘅汁一口必出嚟，另外年糕同蜜糖腸又炸得好香脆，真係好適合年青人。跟住再嚟嘅係忌廉芝士炒年糕，呢個簡直係魔鬼之選，但非常好味，忌廉芝士滿滿包住每一條麵，拼埋魚糕同雞蛋，跑返10個圈都抵。海鮮煎餅係每一次去韓國餐廳必要，海鮮料非常足料，魷魚蝦滿滿俾韭菜包住，唔會話食落去成口粉咁，師傅亦都將呢個食物煎得非常香脆。另外牛肉炒粉絲亦都炒得非常之香，粉絲唔會太林之餘，亦都配上牛肉，加上芝麻嘅香，實屬惹味。最後我哋覺得一人需要食返啖飯先滿足，嗌咗個辣豬肉炒飯，都係一樣呢種韓式嘅辣醬撈埋啲飯已經好味，配上半肥瘦嘅五花腩簡直係錦上添花，同埋呢度嘅環境好友感覺，恍如置身韓國一樣，同朋友三五知己來聚會一定好開心。