hoo韓國包車

營業中

休息中

hoo韓國包車係一間以韓國大排檔做主題嘅韓國餐廳，店面雖然唔算特別大，但每一個角落都花左心思佈置，喺度食野就真係好似去韓國街邊左大排檔咁，但唔同嘅係，哩度係有冷氣，唔怕食到身水身汗。簡單嘅摺枱同膠凳，再以汽水膠架當雜物架俾客人擺袋，再加埋旁邊嘅鐵閘、洗衣機、衣車，就好似返左七八十年代咁，好得意，亦好啱打卡。一坐低，侍應先黎兩碟韓式前菜，芽菜清爽，泡菜爽脆唔會太辣。甜辣炸雞($158/Medium) - 炸雞有五大件，甜辣炸雞其實冇乜辣味，以甜味為主，甜辣醬唔會太多食到滿頭滿面都係，炸皮幾脆，雞肉都唔會太鞋。跟炸雞一齊上枱仲有一小碟醃蘿蔔，好夠酸好消滯。泡菜煎餅($82) - 泡菜煎餅辣度比甜辣炸雞辣少少，辣度大約等於小辣，煎餅厚薄適中，唔會成口粉咁，蘸埋另附嘅醬汁食都唔錯。總結，野食整體唔差嘅，不過最特別都係個環境，每個角落都係打卡位。